كيف تصبح مصمم جرافيك ناجح ؟!.

التصميم موهبة وفطرة ولا تعلم واكتساب؟!

ازاي تبقي مصمم جرافيك ناجح

لو انت بتحب التصميم والالوان والتأثيرات وبتعرف تنسق الالوان والاشكال مع بعض، يبقا انت عندك الموهبة دي طبيعية، لكن لو القدرات دي عندك محدودة بس انت حابب تطورها يبقا كدا انت هتكتسبها وتطورها..

مش معنى أن عندك موهبة يبقا مش محتاج تتعلم ولا معنى أن معندكش الموهبة يبقا مش هتعرف، كل حاجة بالتعلم والممارسة بتنفع وبتطور :) 

طب ازاي ابقا مصمم ناجح؟!

لازم يبقا عندك اساسيات ومبادئ، مش مجرد انك نزلت برنامج من برامج التصميم زي الفوتوشوب أو الأليستريتور أو انديزين واشتغلت عليه مرة يبقا انت كدا مصمم ناجح ومفيش زيك. لأ انت كدا ف اول سلمة عشان تبقا مصمم ناجح.

المصمم المحترف اللي شغال في شركة كبيرة ومرموقة وبياخد مرتب مرموق وبنشوف تصاميمه في الاعلانات في الشوارع والطرق الكبيرة، دا مبقاش كدا من فراغ دا المصمم الناجح اللي اشتغل على نفسه صح وتعب وتتعلم الأساسيات صح ومارس كتير فبالتالي أصبح في المكانة اللي هو فيها دي..

في بعض النقاط اللي لازم تاخد بالك منها كويس وتكون عارفها وتتعلمها كويس جدا..

انك تتعلم البرامج صح

 تتعلم الادوات صح  ، مش بس تتعلم الادوات، انت كمان تبقا عارف الأداة دي اتعملت ليه وايه الهدف منها. شغفك هو سلاحك لازم تحافظ عليه وتتعلم ع قد ما تقدر، كل حاجة ليها علوم كتيرة تقدر تتعلمها وتنسقها بزوقك واستايلك اللي يميزك ويخليك توازن بين طلب العميل ووجهة نظرك عشان تبقا فاهم طبيعة التصميم المطلوب، والعلم بحر ملوش آخر.

لازم تبقا فاهم 

يعني ايه تصميم ويعني ايه كتلة وفراغ. تبقا تصاميمك موزونة فيها توازن بين المساحات والالوان، بحيث ميبقاش زحمة ولا فاضي وميبقاش ممتلئ. وكمان تبقا فاهم الهدف من التصميم وظروفه ومعاييره،
مثال: اعلان لشركة اديداس على الطريق السريع، الاعلان كان عبارة عن خلفية سوداء ولوجو الشركة بالابيض في جانب علوي من التصميم فقط!

اعلان 

هل الشركة معندهاش مصممين! لأ طبعا، طب ايه الهدف من الإعلان دا؟ المصمم هنا أخد في عين الاعتبار أن الإعلان دا على طريق سريع يعني مفيش وقت للقراءة، وهدفه من الإعلان دا أنه يجذب الأشخاص لاسم الشركة والبراند بحيث أنه يفضل فاكر البراند دا، مجرد ماهيشوف الإعلان في اقل من ٥ ثواني هيلفت انتباهه الوجود الشركة.فهو حط مكان اللوجو في مكان اسمه الجولدن بوينت (golden point) 

كل دا لازم تبقا فاهمه وعارفه كويس.

 القراءة

القراءة مهمة جدا، وزي ماقولنا في البداية العلم ملوش آخر، وكل يوم في كتب جديدة ومقالات بالتحديات والجديد اللي بيحصل في البرامج وفي مجال التصميم، يبقا لازم تقرا وتوسع مداركك للمعرفة، على سبيل المثال: كتاب مخصص لبرنامج الفوتوشوب فقط في تفاصيل ومعلومات كتيرة مهمة ومفيدة

وكل ماتبزل مجهود انك تتعلم حاجة جديدة، كل ماهيعليك وهيعلي من مستواك في التصميم وفي طريق انك تكون مصمم ناجح.

 اهم نقطة الاستمرارية

انت لازم تشتغل على نفسك كتير، على سبيل المثال أن يبقا هدفك كل يوم على الأقل تصميم واحد، حتى لو هتقلد تصميم مشهور أو تصميم عجبك وحائل تعمل زيه، التقليد دا في البداية مش وحش ولا سرقة بالعكس انت بتنمي مهاراتك وبتتعلم وبتقارن نفسك ومستواك في استخدام الأدوات دي.

وكل اللي فات دا بداية لانك تتعلم معانا ازاي تبقا مصمم ناجح، ومتمكن من كل الأدوات في برامج التصميم.

واحدة واحدة مع بعض، وبالاستمرارية هتبقا مصمم ناجح جدًا :)

تعديل المقال